‘Cidh on?’ ar Finnen, ‘nach lor daibh beth isin coimhtinol sa mar ataithi?’
‘Nocha lór,’ ar siat.
‘Cret na huilc is mo doronsabar?’ ar in clérech.
‘Roloiscsem ceall ar leth ceald Connacht, & ni ruc eascob na sacart maithiumh n-anacuil uaind.’
‘Ni ticfa dibhsi,’ ar Finnen, ‘anum do thabairt ina dainib romarbsabar, acht aen ní rofhedfaithi .i. tighi do dhenumh isna ceallaib roloiscsibar, & gach ni ele roloitsiubar isna ceallaib sin do lesugud. Ocus daber, ’ ar se, ‘luth & nert céit in gach fer acuibh, & benfat sgis cos & lám & midbac droma uaibh, & dober loss & solad daibh arnach bid urcra.’