Corpus of Electronic Texts Edition
The Voyage of the Hui Corra (Author: Unknown)
section 14
Doigh lem, ar Lochan, ni he sin ni is cora dhún
p.32
do dénumh. Uair olc an tigerna dar' fhognumar, ar se, ocus maith an tigerna ar a ndernsam fogal & dibercc custratsa . Ocus atconnarcsa aislingi granda adhuathmar .i. mu breith d'fegadh nimhe & ithfirn, ait i mboi imut pian ar drongaibh d'anmanaibh daoine & ar demnuibh. Rochonnac tra cetre srotha an ifirn .i. sruth loiscenn & sruth naithrech & sruth teneadh & sruth snechta.5 Atconnarc best an ifirn gu n-imut cenn & cos fuirri, & rogebdais fir domhain bas dia faicsin. Roconnarc iarsin mu breith do dhegadh nimhe, & roconnarc in Coimdhi fesin 'na rígshuidhi & enlaith aingel ac oirfidedh do. Roconnac tra en edrocht, & ba binne na gach ceol a canad. Michel immorro is e bhai a richt an eoin i fiadhnusi an Duileman. As i mu comairli-si daib, ar Lochan, bur n-airm do tregadh & Dia do lenmain budeasta.
Cidh on, ar Enne, ann geba an Coimdhe aithrige uann isna morolcuibh doronsam?