Corpus of Electronic Texts Edition
Aided Muirchertaig Meic Erca (Author: Unknown)

p.1

Section 1


1] Dia mbuí Muirchertach mac Muiredaig meic Eógain, ríg Érenn, i tig Cletig ós ur Bóinne in Broga, & ba hí ba ban-chéli dósum Duaibsech, ingen Duach Tenga umai, ríg Connacht. Tánic in ríg sin amach óen da laí do mílrad
5] fa imell in Broga, & ro fhágsat a lucht sealga a aenar hé ina duma shelga.

Section 2

Ní cian dia raibe ann co facaid óen-ingen chruth-álaind, chenn-fhind, chnes-solus, & brat uaine impe i suide 'na fhochraib isin fert fódmuigi, & dar leis nocon
10] fhaca don droing banda a com-álaind ná a com-chuanna , gura línustar a cholann uile dá grád , & a aicned. Uair dar leis re fégad do-bérad Ériu uile ara híasacht óenaidche, mar do char co hadbal hí re faicsin. & ro fhersum fáilti fria mar bud aichnid dó hí. & ro fhiarfaigh scéla di.

Section 3


15] ‘Adérsa frit,’ ol sí. ‘Isam leannánsa do Muirchertach mac Erca, do ríg Érenn, & is dá shaigid tánagus in so.’ Ba maith la Muirchertach sin, & atbert fria, ‘In tabrai aichne ormsa, a ingen?’ ol sé. ‘Do-berim,’ ol sí, ‘uair isam eólach in inadaib is diamru iná so, &
20] is aichnid dam tusa & firu Érenn ar chena.’ ‘In tice limsa, a ingen?’ ol Muirchertach. ‘Do ragaind ,’ ol sí, ‘acht comad maith mo choma .’ ‘Do-bérsa mo chumang duit, a ingen,’ ar Mac Erca. ‘Do bréthir ris,’ ol in ingen. & tucsum fo chétóir, & adubairt sí in rand:1


    1. 25] Ní hé in cumang nach éimech,
      acht tecusca na cléireach,
      acht mine betís re lá,
      nocho ticfaindsi sunna.

      2. p.2

    2. Ná triallsa réir na cléirech
      30] & na mban co héimech;
      dó féin shires cléirech ní,
      ná déna díb acht neifní.

    1. Ná cronaig cléirchiu co grind,
      a ingen glégeal, guth-bind,
      35] uair is ferrdi biad {MS Y folio/facs page 311/314a}cach neach
      dá raib do réir na cléirech.
    2. A ingen, ná habair sin,
      lucht in chrábaid ná cronaig;
      na clérig chreidius in rí
      40] díb nocha dénta neifní.

    Ní hé

Section 4

‘Do-bérsa cét di cech crud duit, & cét cornd , & cét copán , & cét falach óir, & feis cech dara haidche a tig Cletig,’ ‘Acc itir,’ ar in ingen, ‘nocha n-amlaid sin bias, acht cen m'ainmsea do ráda duitsiu co bráth, & cen Duaibsig,
45] máthair do chlaindi, do beith im agaid, & cen na clérig do thoidecht in óen-teach rium co bráth.’ ‘Ragaid duitsiu,’ ol in ríg, ‘uair tucusa bréthir riut, & ropad usa limsa leath Érenn duitsiu iná sin, & abair rium co fír,’ ol in ríg, ‘cá hainm fil fortsu itir, dá fédmais a sheachna
50] gan a ráda.’ & 2asbert sí, ‘Osnad, Easnadh, Sín, Gaeth Garb, Gem-adaig, Ochsad, Iachtad, Taetean.’ Conad and sin atbert in laídsea sís:

    1. Abair rim h'ainm, a ingen,
      a bean ro-chaemda, rind-geal;
      55] aní scaras mé rém chloind
      ná ceil ormsa dá seachnaind.

  1. Osnad, Esnad, Sán cen ail,
    Gaeth Garb, & Gem-adaig,
    Ochsad, Iachtad, Taetean taí,
    60] is iat m'anmanna ar aen-chaí.

    2. p.3

  2. Do-béraind cét da cech crud
    duit, a ingen, cen imrul,
    dá léictheá dam h'ainm do rád,
    & do gairm cech óen-tráth.


  3. 65] Créd do-génsa da cech maith,
    a ríg Érenn, a ard-fhlaith?
    Bid marb thú dá ráidi, a rí,
    rachaid do nert ar nefní.

  4. Ropad aíbind lim cach than,
    70] a ingen na rosc ro-glan,
    má dá n-apraind riut co fír
    Osnad, Esnad, & Sín.

  5. Ná hapairsiu sin cen tlás
    mine b'áil duit do moch-bás,
    75] & ná ticead isteach
    máthair do chloindi, Duaibseach.

  6. Do-génsa do riar co fír.
    Ná tabrad h'aicned i sním.
    Cach ní bus olc ná tagair,
    80] ní ebérsa, & abair.

    7. a.r.

Section 5

Ro gellad disi, trá, cech ní díb sin, & ro naisc amlaid. Do-chuadar maróen iar sin co teach Cletig. Ba maith suidiugud in tige sin, trá, & ba maith a muindter & a theglach, & maithi cloindi Néill uile co muirneach, mór-menmnach,
85] co subach, sobrónach, ic caithem chísa & conáich cacha cúicid i tig comramach Cletig ós ur na Bóinne bradánaigi, bith-áilli, & ós ur in Broga barr-uaine.

Section 6

Ó ro fhég Sín immorro in teach co n-a muindtir , asbert: ‘Is maith in teach a táncamar,’ ol sí. ‘Is maith,’
90] ol in ríg, ‘& ní dernad do 3Themair ná do Nás ná do Chraebruaid

p.4

ná do Emain Mache ná do Aileach Néit ná do Chleitech teach a leithéid, & tabair teist in tigesea,’ ol in ríg, & atbert: 4

    1. Ní dernad ic ríg, dar lind,
      95] teach mar do theach ós Bóind,
      's ní dingéntar ó so amach
      gus in laithi ndéidenach.
    2. Cleiteach cléthi theach Fódla,
      is fairsing a furógra,
      100] ó Thoraid co Carnd hUí Néit
      'na chomair tall gan lán-bréig.
    3. Cland Eógain isin tig tall,
      ard-chlanna Néill nach im-gann,
      nocha n-uil muindter is fearr
      105] i n-iath Alban ná Érenn.
    4. Tusa, a Muirchertaig, cen fhell
      ní thánic riam laech it cheand,
      co bráth ní thicfa re lá,
      a ua Eógain do shamla.
    5. 110] Is dingbála duit cen acht
      Duaibsech, ingen ríg Connacht,
      álaind a delb, caem a llí,
      ní fhil ben is ferr im ní.

    Ni .d.

Section 7

‘Cid do-géntar ann fodesta?’ ol in ingen. ‘Aní
115] is maith latsu,’ ol Muirchertach. ‘Máseadh,’ ar Sín, ‘téigead Duaibsech co n-a cloind asin tig amach, & ticed fer cecha cerdi & cecha eladan a nÉrinn co n-a mnaí isin teach n-óil.’ Do-rónad amlaid sin, & rogab cách ic

p.5

molad a cherdi & a ealadan féin ann, & do-rónad rand da
120] cech duine cherdi & eladan do bí and sin uile : 5
    1. Aíbind, aíbind rígi rán
      tíre Érenn, mór a grád,
      a cís 'gá chlechtad re lind,
      co teach Cletig is aíbind.
    2. 125] Aíbind, aíbind a rígnacht,
      aíbind a míne, a mállacht,
      fuaras a maith, monar ngrinn,
      damsa is saich, is aíbind.
    3. Aíbind, aíbind taísigecht
      130] ag ríg Érenn co ríg-nert,
      cid cumang Ériu re lind,
      cá duine dó nach aíbind?
    4. Aíbind, aíbind trebthachus
      do duine bís 'na dúthchus;
      135] imad ceathra, saethar ngrinn,
      cen terca ann is aíbind.
    5. Aíbind, aíbind ceól cen acht
      do lucht in chiúil co rígdacht;
      da cach aen ros can co bind
      140] dóib cacha tan is aíbind.
    6. {MS Y folio/facs page 312/314b}Aíbind, aíbind in goibnecht
      don lucht do-ní gan toirmesc;
      is maith a tuaith is a cill,
      nocha n-é a buaid nach aíbind.

      7. p.6

    7. 145] Aíbind, aíbind cerdacht chaem
      do cech óen do-gní ma-róen;
      is imda mogaid re lind,
      dúind is tulaigsi is aíbind.
    8. Aíbind, aíbind óglachus
      150] ag Mac Erca na mór-gus;
      i tig Cletig, monar ngrind,
      cia duine dó nách aíbind?
    9. Aíbind, aíbind cech dán teann
      anosa i n-iathaib Érenn;
      155] cách ica caithim co grind
      itir maithib is aíbind.

      10. Aibind a.r.

Section 8

Ó thairnic in t-ól asbert Sín fri Muirchertach, ‘Is mithig fodesta in teach do légud damsa amail ro gellad dam.’ Is ann sin do chuir sí clanna Néill & Duaibsech
160] co n-a claind a Cleitech amach. & is é lín ro bátar itir firu & mná dá chath chom-móra, chonaclacha.

Section 9

Do-chuaid Duaibsech co n-a cloind ó Chleitech co Tuilén do shaigid a hanmcharad .i. Cairnech naem-espoc . Ó ro-siacht sí co Cairnech 6 atbert na briathra sa:

    1. 165] A chlérig, bennaig mo chorp,
      is eagail lim bás anocht;
      tánic chugam ben a síd,
      suaill nach derna dím dimbríg.

  1. A banscál, bid maith do díl,
    170] fo-géba nem cen anfír;
    don turus tángais i-lle
    ní racha doridise.

    2. p.7

  2. Érig féin, a chlérig ann
    co hEógan is co Conall,

    175] atát 'na congaib ma-lle
    sin tulaig co turnaide.

  3. Bísiu i fos i nÓenach Réil,
    a Duaibsech gus in deg-méin,
    is uait sloindfither co bráth

    180] in bile buadach sin ráth.

  4. Atlochar do Mac Muire,
    don ríg connic na huile;
    tánac fa chreidem óm thig.
    Atlochar duit, a chlérig.

    5. A chlérig b.

Section 10


185] Tánic Cairnech iar sin co hEógan & co Conall, & do-chuadar ma-róen doridisi co Cleitech, & nír léic Sín a légud i farrad in dúine uile. Bátar dubaig, toirsig clanna Néill don gním sin. Fergaigthir co mór Cairnech ann side & ro eascain in baile & do-rigne leacht don ríg &
190] asbert, ‘Tairnic intí isa leacht so. & is deread dá rígi & dá fhlaithemnus co fír,’ & do-chuaid for mullach in lechta 7& dixit:

    1. Duma na clog so co bráth
      fodesta ro-fhinnfa cách;

      195] leacht in trén-fhir Meic Erca
      nírba tláith a imthechta.
    2. Mallacht forsin tulaigsi,
      for Cletiuch cétaib cuana,
      narap maith a ith ná a blicht,

      200] gurop lán dfhuath is d'anricht.

      3. p.8

    3. Narab ann ríg ná ruirech,
      ní dig neach ass co buidech;
      bid cumain limsa rem lá
      lecht ríg Érenn sin duma.

      4. D. n.