‘Ber-siu do muntir didiu,’ ol in t-oglach, ‘ocus beir in cuach corob fri etirgleodh fíra & goa agud, & bidh agud in craebh fri ceol & fri hairfideadh, & berthar uaid íad uile in la fogeba bas. Misi Manandan mac Lir,’ ar se, ‘righ Thíri Tarrngiri, & is aire doradus alle d'fhechsain Tíri Tarrngire.’
IS e in marcsluag atconnarcais ic tuighi in tighi, æs dana Erenn annsin ag tinol cruidh & cethri, & teit ar neimthní ass. IS e in fear atcon[n]arcais ic fadod na teinedh, oigtigerna andsin, & icais asa treabadh cach ní chaitheas. As e in topur adcon[n]arcais cusna coic srothaibh ass .i. topur in fis. IS iad na cuic cétfadha triassa tarrthaitear in fis, & didiu ní bia dan lais nach ní na hiba dig asin tobur fesin & asna srothaibh. Luch na n-illdan is iad eabhus estib diblínaib.