Cuach Cormaic fesin didiu .i. cuach oir bai lais. Is amlaid didiu dofrith eiside on mud-sa.
Laa n-æin dobai Cormac ua Cuind madan moch i cetamun a ænur for Mur Tea hi Temraig. Conaca in t-æn oclach forosta findliath adochum. Brat corcra corrtharach uime. Leni esnadach orsnáith hi custal a chnis. Da mæl-asa finddruine etir a troigthibh & talmhain. Cræbh airgid co tri hublaib oir fria ais. Ba leor peted & arpeatad immorro eistecht risin ceol dogníd in cræbh, a[r] rochoideoldais fir athgaiti nó mna siuil nó fiallach galair risin ceol dogníd sin intan docroitheadh in chræb.