.i. Luchta drai dochoidh dia fhoglaim il-Letha, con-aca é ní ingnadh occa ic delugud fhirindi & breigi .i. iarnn do senadh lía ndruidib, & a chor a teinidh iarsin com[b]ad dearg, & a tabairt for bois in lit[h]ig. No loiscedh immorro hé dia mbedh cin occa. Ni denad urchoid dho mina bheth cintach. Atbert Luchta iarsin friu ‘Noricfaidh a leas againdi fir Erenn,’ for se ‘sud do delugud etir firindi & breig.’ Dobretha Luchta a iarnn senta lais iartain, co mbaí ic delugud etir gai & fhír, conidh de sin leantar iarnn se[n]ta beus ag Gæidelaib dogrés.