Iarsin tra atbert Cormac ra Cithhruadh: ‘Dena,’ ar se, ‘ni d'faitsine dhun bheos, or as amhlaidh itai gu rub tu primh-drai agum athair & agum shen-athair & agum fein, & ni aburta breic, & ni mo ro raidhis don cur-sa, acht nach did ro adhraimis-ne & ní fuil againn budhecht acht impod friut & is aithrec linn a tartsam do tarcasal fort.’ ‘Ni fhuil acum-sa,’ ar Cithruadh, ‘faitsine geallus maith duit, acht as fort meabhus don cur-sa & gac ni ima tat fir Muman bud leo a bhuaid.’ Ro ghabustar Cormac beos ic acallaimh Cith Ruaidh, & ica radh ris dul d'acalduim Mogha Ruith, & a mbrathairsi bhunaidh do tabairt ar aird do & a radh ris gan tortromad ar Leith Cuind & gur bho do mhaithib Leithi Cuind athair & sen-athair dho; ‘& tairg na comhtha-sa dho re thaeibh-sin,’ ar Cormac ‘.i. flaithius Ulad & cumhul mac nUislenn & bo gac lis o Themhraidh co Carraic mBracuidi & tri cet each & tri cet corn, & tri ced faluch & mu lamh dheas oc ol.’