Atconnaic dono Cithruadh aidhead na caerach; tainic i remthus in tsloigh anonn co hait a mbai Cormac. Do fiafruigh Cormac do Chithruadh: ‘Cidh uma tat na gairthe-sea, & cia doni?’ — ‘Fir Muman,’ ar Cithruadh, ‘ac comaidhium in lochta as ro muinighis-si & frisi tartais taebh, ar na marbadh do conuibh draidhechta doroine Mogh Ruith.’ Cidh tra ba dubac drochmenmac ro bui sluagh Cormaic de-sin & ba subac ro badar fir Muman & ro chan Cithruadh in laid: ‘It subhuig na sluaigh-si thes, et rel.’. ‘Ma as fír a n-abrai-si,’ ar Cormac, ‘as deithbir doib subhachas do dheanamh.’ ‘As fir,’ ar Cithruadh, ‘& moghenar is do Leth Moga anocht & mairg as do Leth Cuind & ro budh ferr leam-sa mu tech do beith ic Seich na Sogh inocht, gid fasach, inas a beith ic Rubaib Ratha Ronan, ge at imdha treabhu uimpi. Ocus as oraibh-si raeinfes an cath don cur-sa & muirbfider sloigh & sochaide ann, & ni ba ferr duin-ne ar triar brathar, or doghena Mogh Ruith tri clocha dhin, re tiachtain don turus-so’; & atbert: ‘Mairg innocht is do Leith Cuinn, et rel.’