Ocus ro fhiafraigh Mogh Ruith do Cennmar: Na caerigh cinnus docengadar? As cugainn-ne tecuit ar Ceannmhar. & in cura as sine dhibh i remthus & in as so fa deredh. Ocus na coin fa dechta cinnus do fhegadar? Itat, ar se ar se, mar bít cuilena, ic osculud a sul & as iat na cairigh fhegad. Ocus na cairigh, cinnus docengait? Dá chairigh dibh taebh ra taebh & cura fa deoig, & is luath thiaguit. Ocus na coin cinnus dofhegadar? Itat ic bertnugad a sul & a cluas & as iat na cairigh fhegat bheos. Ocus na cairigh, cinnus focengat? Itat mar bit tri rodhaim riadhta fo aen chuing cruaidh cudrama & ni theit aen dib seach araili & as dian & as dreamun & as dasachtach & as comluath & as comurlamh thiaguit ind-airius in comluinn. Ocus na coin cinnus do fhegatar? Ro bertnaighistar a cluasa & ro thocuibset a seirthi & gabsat oc imlighi a mbel & a cindu for a righthibh & a mbeoil duinti. As iat sein uili na buagha, ar Mogh Ruith, ar dia mbeitis a mbeoil osluigthi ic dul isin comhlunn no biath demuin merclig oc gait a n-aithesa forru; uair isat duinti immorro doghenat áithius, as fon innus-sin doghena a sil & a semed aithus do gres.