Ocus ro fhiafraigh Mogh Ruith do Cennmar: ‘Na caerigh cinnus docengadar?’ ‘As cugainn-ne tecuit’ ar Ceannmhar. ‘& in cura as sine dhibh i remthus & in as so fa deredh.’ ‘Ocus na coin fa dechta cinnus do fhegadar?’ ‘Itat’, ar se ar se, ‘mar bít cuilena, ic osculud a sul & as iat na cairigh fhegad.’ ‘Ocus na cairigh, cinnus docengait?’ ‘Dá chairigh dibh taebh ra taebh & cura fa deoig, & is luath thiaguit.’ ‘Ocus na coin cinnus dofhegadar?’ ‘Itat ic bertnugad a sul & a cluas & as iat na cairigh fhegat bheos.’ ‘Ocus na cairigh, cinnus focengat?’ ‘Itat mar bit tri rodhaim riadhta fo aen chuing cruaidh cudrama & ni theit aen dib seach araili & as dian & as dreamun & as dasachtach & as comluath & as comurlamh thiaguit ind-airius in comluinn.’ ‘Ocus na coin cinnus do fhegatar?’ ‘Ro bertnaighistar a cluasa & ro thocuibset a seirthi & gabsat oc imlighi a mbel & a cindu for a righthibh & a mbeoil duinti.’ ‘As iat sein uili na buagha’, ar Mogh Ruith, ‘ar dia mbeitis a mbeoil osluigthi ic dul isin comhlunn no biath demuin merclig oc gait a n-aithesa forru; uair isat duinti immorro doghenat áithius, as fon innus-sin doghena a sil & a semed aithus do gres.’