‘A fhir shochair tra,’ ar fir Muman, ‘atat sunna cetna i richt tri caerech lachtna & cetfer n-armach bhis i croilghi & i mbas uathaibh.’ ‘Dingebhut-sa dhibh iat’, ar Mogh Ruith. ‘Ocus na bidh a n-egla foruibh.’ Ocus ro fhiafraigh do Cennmhár: ‘Caidhet na haidme druidhechta thucus-sa it laimh ra frithailimh an lochta ut?’ ‘Itat agum’, ar Cennmhar. Ocus rob iat sein .i. tallann teined Shimoin & clocha gaine Daineoil & sponga Etheoir Ilcrothaig, & tugadh i laim Mogha Ruith & is aire robdar é sin na hadbair: ar dáig co mbeath cruas cloiche a cridhibh & a cennuibh doibh ra huair comlainn. Ocus loiscthigi teined & aentaigi datha frisna caeiribh.