O atconnuic Mogh Corb gur fortamluigh an eascang for Cholptha, atbert ra Cennmhár: Fort do colaingcel, ar se, is olc dhuid gan ní do maisi an ecta & clu marbhtha an aithigh do beith fort. Is ann sin ro gabh Cennmhar slegh draidhechta Mogha Ruith n-a laim, & saidhis hi a Colptha os a chinn co fortren feramail & aithnes Mogh Corb dhe a imdhiten fair. Sceindis Cennmhar chuigi iarum co claidem mor mileta Mogha Ruith, con selustar beim dho, con tobacht a cenn de. & facbus in cend ann sin & tic for tir & toitid a taem-laem genaidechta air & a thaisi marbhtha & mele. Sceindis Mogh Corb isin ath & gabhus in cenn & tic lais.