Ni h-indister tra comlunn na coimeascar do dhenam do Cennmar & do Colptha annsin & ni he Colptha {O'Longan folio 178a2} na taircedh, or, intan atconnaic ecasc Cennmhair isin ath, sceindis cuigi & imselais tri beiminda dho don claidem mor mhilita bui n-a laim co taillfedh mac midaeisi i fuillshlicht gac beime dhib isin cloich. Sceindis an escang cuigi-sium ann saide & gabus tulpart a édain & a aighthi fair & gabsat seachnon ind atha co tancatar fecht fo tri n-a thimcheall & Colptha a n-uachtar gach re fecht & in eascong in fecht aili. Ro scarad Colpha ra armaibh ann sin & ro bruighmhinaigit im a lamhaib. Ro fortamlaigh tra in escong for Colptha, & benais fria chnes, & tig timcheall a neirt & doni noi snadma dhi im-a churp fria a dhoitibh anechtair & tic traigh dhi fai & traigh uasa & intan no triallad coisceim do breith do beired sí builli da herr dar an cois nous tocbhadh & do beredh beim dhe fria talmain & intan no thocbad a cheann no gheibhedh an escong ider a dha carpat in blagh ba sia uaithi don cinn, & imseladh beim dhe frisin sruth.