O thairnic dona draithibh an imacallamh-sin, gabsat oc gnó. Ocus dochuaidh Cennmhar for amus in atha & nis faca Colptha con deisidh ar ur in atha & cureas in cloich roime san áth & doghni murescang shith-remair dhi, feibh atcuadhamur romuinn. Ocus atnaidh Cennmhar fein a ndeilbh cloiche, for an ath. Cloch mor immorro bai isin ath soighter iside i richd Cennmhair. Gabhaidh iarsin anfadh for an ath, amal tonna dileand i llo cruadhghaeithi earraig fo anfad in mhor-mara. Ocus ba dethbir do ceachtar n-ai inni-sin, or ba doig la clannaibh Cuind um Cormac ba druidhecht & diabaldan Moga Ruith ro comlaisetar na tonna-sin, & ba doigh la Fiacha & la fira Muman ba druidhecht & diabaldan Cholptha no chomhlai in moranfad-sin for lar in mor-muighi n-a bhfhiadhnuisi, curgabh uromon ceathra coiged Eirenn fon samail-sin.