Tancas uadaibh-sium iardain ar cenn úire Chorrchaille Meic Con, .i. Cailli Menne meic Erca meic Degadh frísín abar Firmhaighi inniu. Is aire atbertar Cailli mac n-Eirc ris, ar ro bhatar a mheic ann. .i. Menne mac Erca & Uatha mac Erca & Ailbhe mac Erca. Ainm ele do Firmuighi Méne, ar imut a mianaigh isna sleibibh fileat imbe & dano cloch mhein in gach ghurt ann bheos. Ainm ele dho, Corr Cailli meic Con, ar rob é ruidlius Clainne Dairine, & is ann ata Rosach na righ & is ann ro bhai Mac Con no gu tucadh Cath Cinn Abhratt. Rucudh chuigi-sium iarum úir na crichi-sin & ro raidh na briathra-sa oc a tagha: ‘Sliab um fhigh. figh um magh. magh cu srothaihh sainemlaibh. fo midhabunn. fo sruthabunn. fo nemhleith. rasuighthe sealg. sernfaid slechtaibh. sluaghuibh sochaidibh solmhaibh. airdíbh echtghonaighaigsig anairmrinnid. iarann fou, iarunn forro. fir mhu mna fir mu maic. fir mu cliom. fir muichit. fir dianaibh togairter do neimib nathrach do chaidib dracon. co lutha lonnaidi co lainnibh langhaile. mar luisin lanadhbhuil. fo lasair lainerdha. letras fraech for cocnus figh silas sliabh.’ Sliab.