Ra dhichelsatair iarsin uisgi in cuicidh uili acht in cutraime no foghnad do Chormac & da sluagh, & ni raibhi dicheilt doibh-sidhe forro. Ocus dano tucsat tart & ita ar lucht in cuicid uili iter daine & almhai & innile. Ro cuinghedh in cain iarsin o Chormac & ni tucadh do. Is e ní arroimpaset fir Mumhan iarsin, uair nach scemnta nó sirthi doghnidh Cormac: loimm & ass & medg do thabairt cuca o a muindteruibh a ngach inad a mbitis. Ro hinnised do Chormac sin & ro raidh fria draidhibh: ‘Cidh dia ndingnet fir Muman aitidiugud damh-sa gin gu faghbhat uisge cein fogabhut ass & loim & medg?’ — ‘Ni duilghi lin-ni,’ ar siat, ‘a llacht do breith o na buaibh inat na husgedha do dhiclith ar na sloghuibh.’ Conadh ann-sin rucsat a lacht o na buaibh. Ocus dano tucsat tart for echaibh & cairibh & buaibh & ar uilibh innilib in cuicid. Ocus cia mad idir sloghaib in cuicid uili no betis ní mo do boghéimnigh & do shitrigh & do sreodhfadaigh doghendais almhai in cuicid.