Corpus of Electronic Texts Edition
Forbuis Droma Damhghaire (Author: Unknown)

section 48

Ro cuingedh o Chormac comhlunn cét ar feruibh Mumhan. Dodhechatar atuaidh ann-saidhe tri h-ingena Mhaoili Miscaidhche .i. Errgi & Eng & Engain, in deilbh tri caerach leachtna gu cnesaibh congnai, gu cennuibh cnamha, gu nguilbnibh iaruind, gu neimh dhitha ced ra h-uair comhluinn. {ms folio 174a1} Ocus dano niís geibhdis renna na foebra in betha loe na finna dhoibh. Ro tinced o feruibh Muman in comlunn ced & ra coraighit na cliatha cruaidhi conacalltha do ghaibh coirrbreaca cruaidh gera i llamibh leo, gu leibenn sciath retlannach i timchill in tsloigh & tri chlaidibh troma thortbhuilledha a n-intighibh dhoibh gu sleaghuibh sodhibraicthe leo ra hairitin aidh agus irgaili & ra tinnscetul deabhtha. Ocus o ro comhraicset anes & atuaidh imsou cach co a chele dhibh.