Corpus of Electronic Texts Edition
Forbuis Droma Damhghaire (Author: Unknown)

section 39

Gabhus Cithruadh iarsin ar a sádhud & ic gabhail férne na pupla don talmain & ni ro dhipad ar fér nach ar fonn uadh fern na pupla & do scithiged in drai & ro raid: ‘atci so, a Chormaic, & gin gur ghabhuis aithne uaim-si as reil dait ar in cleith-si in ro raidhsem-ne friut ria tiachtuin a Temhraigh’; & do raidh in retorec.

‘Adchi in cleith sin, a Chormaic. Cid attuais-si taidbit. ni cor ra Conn nordhairc. fhaithius Temra thairnic. Na tep fer na fonn. forbuis for mac nEoguin. ni ba duibh bus deolaidh. slicht sidhuighi seolaidh. Sidha Cleitich ceolaigh. coiscfiter thall treoraibh. taoth in cath for Chonn. Comluis mac meic cachta. {ms folio 173a1} Mogh Ruith remgarb garta. d'foiridhin a dhalta. tuasluicfidh na tarta. tairrngeridh don tsluagh. seolfaidh rá gail nguinig. co mba duibhsi a dhuiligh. gebhuidh Fodla fuiligh. & Albuin uidhigh. Fiacha fuinigh fuan. fodh fhearr feis i Temhraigh. a chur Codhuil cernaigh ag torruma in teghlaigh. an da arann dar meanmain. ro hor Tragha Lí. olc in damh fadera. biaidh crua is na bera. biat colla cin cenna. scérthair righ fria reabha. sernfaidit slóigh sleagha. Don choir chena adchi.’ ‘adchi.’

Foreimdhig tra Cithruadh in pupall do shádhudh cu ro raidh Cormac: ‘Cle is mana fort, a Chithruaidh, cid dochuaidh do nert intan na ro fhetais in phupall do shadhadh? Ni ghabhudh didiu in tulach fern na pupla acht amail bidh ar cloich no saidhthea.’ ‘Nucon edh itú,’ ar Cithruadh, ‘nach biath do nirt ocum a sadhudh, acht is tria ainfhir ro trialladh.’