Imsoei cach dhibh o cheli dh'aithle na laidhi-sin & teit Cithmor ar amus in longphuirt & do bhi in slógh annsin cu mucha lai ara bharuch. O thainic an maitean ro coimeirigh Cormac cona shloghuibh & tancatar rompa gu Cnoc na Cenn gur gabsat longport ann. Is ann-sin atbert Cormac ra Cithruadh fern a pupla do shadhud. Ocus arai ni ro eirigh Cithruadh, ár forfitir nach fétfadh in puball do shadhudh. Do dhechatar dano slóig in choicid ar deisibh & ar triaruibh for cnocaibh & for tulchuibh impuibh dia bhfegad. Ocus atbert cach re chele dhibh: ‘Atat daimh dilann & cliath bernadha ced iníu i Cnuc na Cenn & ita damghaire shochaide & forngaire slogh. Ocus bid he a ainm o aniu cu brath: Druim Damhghaire.’ Is ann ro raidh Cormac: ‘Fadectsa, a Chithruaidh,’ ar se, ‘sáidh mu pupaill mar no shaidhtea pupaill mh' athar & mu shenathar, ar ní as so raghat no gu tardthar mu chain damh no cu rom eitichter uimpe.’