Corpus of Electronic Texts Edition
Forbuis Droma Damhghaire (Author: Unknown)

section 32

O atcualatar na sloig & na sochaide ro fergaigit cu mor & dorala imach cu dian & gu dreamhan a ndeghaidh in druadh dar glenn siar & atbereadh cach re cheli dibh: ‘Faghbhadh


p.36

in drai bas & aidhedh libh.’ Imsoi in drai a aigid forro & teit i muinicin a dhea & cuirid anal druadh ind aier & i firmimint con derna neul ciach os cinn in tsloigh gur thuit forro & gur cuirestar i loeibricht meraighthi cu ro ela in drai uaidhibh. Iarsin dano as i comairle doronsat o ro bu mela leo na draithi uli do elad uaithibh: slechtaire & lorgaire rompa ar slicht in druadh & beith in a mbuidhnibh & ina ndrechtaibh na dhiaigh. Ocus dobatar seacht lá cona n-oighthibh isin longpurt soin & dronga mora dhibh for lurg {ms folio 172a2} & ní ro fhetsat tect dia tigh ar mhet an breachta ro imir in drai forro. Ocus dano ba mebal leo gia ro fhettais ar no taispenad an drai a lorg doibh cecha maidne for beilgibh & berntaibh & athaibh ar daigh a mbuaidherthi & a n-imscarta ria a muindtir.