Adracht Cormac iarsin & ro chuir a mertin de co n-acca da laim deis oca ingen lucair laimgheal ba caeime do mhnaibh betha & faiteran firaluinn uimpe & lene orshnaith fria cnes & do chuir-si failti re Cormac. — ‘Cia cuires m' fhailti?’ ar Cormac. — ‘Bairrfhinn Blaith Bairche, .i. ingen righ Sidha Buirche a crich Laigean & tucus-sa gradh dait-si, & nuchan uarus h'agallamh cus anosa.’ — ‘Rabhása eimh am' codladh,’ ar se, ‘ra fogurcheol na con intan rom duiscis.’ ‘Mo cubus amh,’ ar an ingen, ‘is olc in t-ord fir do leithédi-si sealg mil maige do denam, ar nir fhurail duit sealg mhuice no aighi amal dognitis airdrigh romud, or is d'aes ocbaid is du sin; is é cradh crotha & dealbha doghni dhoibh & iss eadh in serg samh he.’