O ro siactatar a echlacha gu Cormac, ro raidhset: ‘Ni h-ansud,’ ar siat, ‘foemthair do chain-si, dene in ni bus maith lat cena?’ Ba h-irgrain la Cormac in ni-sin & ro omhnuigh cu mor, ar forfidir ro ba mana adha moir tiachtain ris uma dhligid, uair nach inndliged ro cuinned & se in airdrigi Erenn. Tugait ann-sin a primdraithi gu Cormac .i. Citach {ms folio 170a2} Cithmor, Cect, Crota, Cithruad, oir batar sidhe fria re Cuind & Airt & Chormaic ac faistine & ní frith a n-eiliugad. — ‘Deinidh co h-ullamh faitsine dham-sa,’ ar Cormac: ‘Cidh bias damh don turus-sa teidhim?’ — ‘Forfhinnfom-ne duit-si sin,’ ar siat ‘acht co tuga ré dún ra tur ar ar bfhaitsine?’ — ‘Doberthar,’ ar se. Dothaetsom i formnai i fesa & i n-eolusa & do faillsigedh daibh cu mad de no ragad olc do Cormac a tiachtain i Mumain. Ocus tancatar do shaichtin Cormaic. — ‘Cidh ro faillsiged daibh?’ ar Cormac. —