Dothaegat fodes iarum cu tech Fiachach co tulaigh na righraidi frisan abar Cnoc Raphann inniu. Ro fearad fáilte re h-eclachaibh righ Eirenn ann sin. Ocus ro shlonnsat a n-aithiusc. — ‘Cormac,’ ar siat, ‘roncuir-ne cucaibh-si do chuinghidh a dhligenais foruib.’ — ‘Caidhe sidhe?’ ar fir Muman. ‘Nói fichit bo fa dhó uaibh-si, intan no berth a aeinfect as gac cuiced & ni ruc acht a leth-sin uaibh-si o ro gabh righi. Ocus dano is eicen fadera do a cuingidh, eder, .i. bodhith do thiachtain a seacht colamhnaibh & i primhphortaibh na Temhrach. Ocus dano is sibh-si ro mharbh a athair & is dligid cumhal do inn.’ Ro innis Fiacha dh'fheraibh Muman sin. Atbertsat fir Muman na tibritis in dedha sin. — ‘Acht chena,’ ar iat, ‘uair is ra h-eicin tancus uadha-sum doberam-ne boin cech lis i Mumain do dia fhoiridhin. Ocus uair nár fharcaibhset againn ar n-aithre, ni ba dín a tabairt do-som na tucsat; ni fuicfium a cind ár mac in ni-sin.’ Ocus dano asbertsat fria Fiachaidh: ‘Tiaghar uait-si dh'agallamh Cormaic, ar is doigh nach úaid ro cuinged in cutraime ud orainn?’