Corpus of Electronic Texts Edition
Forbuis Droma Damhghaire (Author: Unknown)

section 6

{ms folio 169b1} Intan tairnic la Cormac foghuil na mbo is ann tainic a reachtaire .i. Maine Mibriarach mac Miduaith. — ‘A Cormaic, ar fhoghluis na bu’, ar se. — ‘Ro fhoghlus,’ ar Cormac. — ‘Nu chon fhetur-sa eim,’ or in reachtaire, — ‘ni notimfuilngedh-sa re enoidhche oc imacallaimh a tigh Themhrach mad re hais mbo doberur toeb duit. Ocus iss ed fodera son ar ro dithiged h'airgadha-sa uili.’ Ro chuir socht ar Chormac in ni-sin & ro raidh. — ‘Cidh ron bai-siu, a reachtaire? nach intan ro bui ni am laim do chuimnighis damh, in uair domroacht mu dlechtinus, ar ni fhuil agum ni duit & ni h-ail damh inndliged d'imirt ar nech; o domroacht mu chain bliadna ni fhuil agam foedal gu ceand mbliadhna.’ Dochoidh Cormac iar-sin na thech ngaeisi & bui ann oc scrudain gaeisi gan nech dia timtereacht acht muna tisda le biadh dho, tri la & tri hoigthe.