Corpus of Electronic Texts Edition

The Death-Tales of the Ulster Heroes (Author: unknown)

tale 2

Aided Chonchobuir

Version A from the Book of Leinster, p. 123b, and the Edinburgh MS. XL, p. 2.

¶1] Bái mesca mór for Ulto fecht n-and i nEmain Macha. Do-curidar didiu immarbága móra & comrama eturro .i. etir Chonall & Coinculaind & Lóegaire. ‘Tucaid dam-sa’ ar Conall ‘inchind Meissgegra co ro-acilliur ócu na comram.’⁶ Ba bés d' Ultaib ind inbaid sin cach curaid nomarbdais ar galaib óenfir nogatta a n-inchind assa cendaib & commesctha áel airthib co ndénad líathróite crúade díb. Ocus intan nobítis i n-immarbáig nó chomramaib dobertis dóib co mbítis inna lámaib.

¶2] ‘Maith, a Chonchobuir,’ ar Conall, ‘na co ndernat óic na comram écht fón innas-sa ar galaib⁷ óinfir, nídat túalngi comram frim-sa.’ ‘Is fír ón,’ ar Conchobur.

¶3] Doratad íarum forsin forud fora mbíd dogrés ind inchind. Luid cách a lethi arnabárach dia cluchiu. Dolluid dano Cet mac Matach do chúairt ectra la Ulto. Béist ass andsam robói i nHérinn in Cet. Ised dolluid-side dar faidchi na hEmna & tri láechcind leis do Ultaib.

¶4] Intan bátar na ónmite 'co cluchiu do inchind Meisgegra, issed atbert ind ónmit fri araile. Rocluinedar Cet aní sin. Ethaid side in n-inchind al-láim indala n-ái & berid leiss, ó rofitir Cet robói i tarngere do Messgegra a dígail iarna écaib. Cach cath & cach irgal nobíd do Chonnachtaib fri Ulto dobered Cet in n-inchind inna chriss dús in tetarthad écht n-amra d' Ultaib do marbad di.

p.6

¶5] Fecht and didiu dolluid-seom intí Cet sair co tuc tánai mbó a Feraib Ross. Donarraid i n-íarmóracht Ulaid ina diaid. Doriachtatar dano Connachtai dond leith aile dia thessarcain-seom. Fechair cath eturro. Dolluid Conchubur féin issin cath. Conid andsin gádatar mná Connacht do Conchobur tuidecht for leith do déscin a delba dóib. Fobíth ní rabi for talmain delb duini amail deilb Conchobuir .i. etir chruth & deilb & dechelt, etir mét & córe & cutrummae, etir rosc & folt & gile, etir gáis & álaig & erlabra, etir erriud & áne & écosc, etir arm & immad & orddan, etir gnáis & gaisced & chenél. Nírbo lochtach tra intí Conchobur. A comairli immorro in Cheit rogabsat na mná ailgis do Chonchobur. Luid íarum for leth a óinur dia déscin dona mnáib.

¶6] Dolluid Cet immorro co mbúi etir na mná immedón. Nos-indlethar Cet inchind Mesgegra isin tábaill & nosteilc conidtarla i m-mullach Conchobuir co mbátar a dá trían inna chind & co torchair-seom isa cend⁸, co tarla fri lár.⁹ Focherddat Ulaid chuci¹⁰ conidrucsat ó Chet. For brú Átha Daire Dá Báeth is and dorochair¹¹ Conchobar. Atá a lige and¹² baile i torchair & corthe fria chend & corthe fria chossa.¹³

¶7] Maidid tra for Connachta¹⁴ co Sciaig¹⁵ Aird na Con¹⁶. Dobertar Ulaid sair doridisi¹⁷ co Áth Daire Dá Báeth. ‘Mo¹⁸ brith-se ass!’ ar Conchobur. ‘Dobér ríge nUlad do neoch nombéra connici mo thech.’ ‘Notbér-sa,’ ar Cend Berraide, ar a gilla fadéin. Dobeir-side lomain imme & nombeir for a muin co Arddachad Slébe Fuáit. Maidid a chride isin gillu. Conid de sin atá ‘ríge Cind Berraide for Ultaib’ .i. in rí for a muin leth ind lái.

¶8] Conócbad trá in debaid ón tráth co araile dar éis in ríg. Co ráimid¹⁹ for Ulto íarsin.

p.8

¶9] Doberar tra a liaig co Conchobar .i. Fingen. Iss éside nofinnad don díaid nothéiged²⁰ don tig in lín nobíd i ngalur 'sin tig ocus cech galar nobíd and. ‘Maith,’²¹ or Fingen, ‘dia taltar²² in chloch as do chind biat marb²³ fo chétóir. Mani tucthar ass immorro, not-ícfaind & bid athis duit.’²⁴ ‘Is asso dún’ ar Ulaid ‘ind athis oldás²⁵ a éc-som.’

¶10] Ro-íccad²⁶ íarum a chend²⁷ & rofúaged co snáth²⁸ óir²⁹, ar ba cumma dath fuilt Conchobuir & dath inn óir. Ocus asbert in liaig fri Conchobar co mbeth i fomtin .i. ar ná tísad a ferg dó & ná digsed for ech & ná etraiged mnái & ná rocaithed biad co anfeta & ná rethed.³⁰

¶11] Robói dano³¹ isin chuntabairt sin céin³² robo beó .i. secht mbliadna & nírbo engnamaid, acht a airisium inna suidi nammá .i. naco cúala Críst do chrochad do Iudaidib.³³ Tánic and side³⁴ crith mór forsna dúli³⁵ & rochrithnaig nem & talam la mét³⁶ in gníma darónad and³⁷ .i. Isu Críst mac Dé bí do chrochad cen chinaid.³⁸ ‘Cráet so?’ ar Conchobur fria drúid. ‘Cia olc mór dogníther isind lathiu-sa indiú?’ ‘Is fír ón ém,’ ar in drúi. ‘Is mór in gním sin,’ ar Conchobur. ‘In fer sin dano’ ar in drúi ‘i n-óenaidchi rogein & rogenis-siu .i. i n-ocht calde Enair cen cop inund bliadain.’³⁹

¶12] Is andsin rochreiti⁴⁰ Conchobar.⁴¹ Ocus issé sin indara fer⁴² rochreti⁴³ do Día i nHérinn⁴⁴ ría tiachtain creitmi é .i. Morand⁴⁵ in fer aile. ‘Maith tra,’ ar Conchobar.⁴⁶ ‘Ba hapraind nadáil cuardríg

p.10

¶13] Is and doringni Conchohar in rethoric se dia ro-innis Bachrach drúi de Lagnib do Chonchobur Críst do chrochad, dia ra-iarfaig Conchobar: ‘Ciata airde ingantacha so?’ &c.

¶14] Nó dano co mbad é Altus in consul dodechaid ó Ochtauín do chungid in chísa co Gáédelaib no-innised do Chonchobur Críst do chrochad.

p.12