Corpus of Electronic Texts Edition
The deaths of Lugaid and Derbforgaill (Author: [unknown])

p.208

Derbfhorgaill ingen ríg Lochlainne rocharastar Coin Culainn ara urscelaib. Do-lluid anair i r-richt da géise & a h-inailt co m-bátar for Loch Cuan & rond óir eturru. Amail ro boí dano Cú Chulainn ocus Lugaid a dalta .i. mac na Tri Find Emna laa and la tóib ind locha co n-accatar na h-eonu. ‘Dibairg na h-eonu’, or Lugaid. Do-lleici Cú Chulainn cloich forru co n-dechaid eter a h-asna co m-boí ina broind. Batar da deilb duine issin tracht fochetoir. ‘Olc robá rim’, ar ind ingen, ‘& is tú doroacht’. ‘Is fír’, ar Cú Chulainn. Ro shúgi íarum a tóeb na ingine in cloich co m-búi ina beolu cosin loim chró ro bói impe. ‘Is dot insaigid tánac-sa tra’, or si. ‘Nathó a ingen’, or se. ‘In tóeb ro shúgiusa’, or se, ‘ní chomraiciubsa riss’. ‘Dombéraso dano do neoch bas maith lat’. ‘Is maith limsa ém’, or se. ‘dul duitsiu cosin mac as sóiriu fil i nh-Érinn .i. Lugaid Riab n-Derg’. ‘Maith lim’, or si, ‘acht conotaccur do grés’. Luid iarum co Lugaid co r-ruc claind dó.

Laa and didiu i n-deriud gemrid. Snechta mór and. Doniat na fir corthe mór don t-shnechtu. Lotar na mná forna corthe. Ba

p.209

h-é a tuscurnud. ‘Tabram ar mún isin coirthe dús cia as sia ragas ind. In ben o ría triit is í as fherr congaib úan’. Ni roacht didiu uadib. Congairther Derbforgaill uadib. Nirbo áill lea or nirbo bæth. Téit arai forsin corthe. Roselaig uade co talam.

‘Dia fessatar trá ind fhir so nícon grádaigfider i fail na óinmná Gatair a súile assa cind & a sróna & a da n-ó & a trilis. Niba soaccobraite ón’.

Do-gnither a pianad amlaid sin & berair iartain da tig. Batar ind fhir is tilaig i n-dáil os Emain.

‘Is ingnad lem, a Lugaid’, ar Cú Chulainn, ‘snechta for taig Derbforgaill’.

‘Is i n-écaib atá si didiu’, ar Lugaid.

Tiagait for comluath dochum in taige. Amail ro chuala si ón dunaid a tech furri.

‘Oslaic’, ar Cú Chulainn. ‘Caín bláth forroscarsam’, or si.

Is and asbert:

    1. Celebraid Cú Chulainn dam.
      domriacht om íathaib iúil:
      & Lugaid luth la beirt.
      dia tartus seirc nachimchiúil.
      2. {MS folio 125b}
    2. Isim éicen dul i cían
      ní fo fechta nodamét

      p.210

      scarad friu bid dál éicne.
      menimthistais écne éc.
    3. La Coin Culainn la Lugaid
      risnarom úath na h-ómon:
      menbad athber co nathlech.
      nibad aithrech ar comol.
    4. Comul scartha fri Riab n-Derg.
      is delg i cridi cró cnis:
      Cú Chulainn do bith in ingnais.
      dirsan menbad leca lis.
    5. Menbad leca Lis Lugdach.
      lasarumnad cach n-derba:
      ba romoch ar n-étarba.
      fri mac na Tri Find Emna.
    6. Nach accimse Coin Culainn
      domringne dérach dubach:
      Díthre mo thúath tragamar
      & scarad fri Lugaid.
    7. Nimrumartsa mo fhianchara.
      Cú Chulainn caraid bruafad:
      bái dam ceile soer subaid
      Lugaid mac Clothrand Cruachan.
    8. Buaid gaile buaid clis ria cách.
      do Choin Culainn cruth rodnaí:
      buaid n-gaiscid do Lugaid lúath.
      buaid mo chrotha sech cech mnaí.

      9. p.211

    9. Cach buaid bid dimbúaid iartain
      cipia frisa ferthar tnú:
      cach indbass bid indless núag.
      cach trén bid truag nó bid trú.
    10. Sirechtach dál in bith cé.
      ní sét frisnemnech do-gní:
      torbais dál báis sech cech n-dúis,
      gnúis chaín cid álaind a lí.
    11. Nimdagenair cridi crúaid.
      dober téb fri ailethuith:
      ara mence shoas gné
      a gnúis ri úair n-dochraite.
    12. In tan imreidmis Emain.
      a Temair nírbo drochband:
      Cú Chulainn and ba subaid.
      & Lugaid mac Clothrand.
    13. Cú Chulainn dam d'acallaim.
      co n-gnímaib danaib dubtaig:
      issed bas lán lam chride.
      & lige la Lugaid.
    14. Roscarsam friar namalla.
      oca mbimmís fri cach sel
      bés no comairsem nach tain.
      rodelbad dam dul ar cel.

      15. C.

p.212

Issed atberatsom ní baí a h-anim intisi in tan tancatar-som istech innund. Asbertat dano ba marb Lugaid achetoir oca descin. Luid immorro Cú Chulainn isa tech cosna mná co tarat a tech forthu conna tudchid fer na ben i m-bethaid assin tig sin .i. dona tri coicdaib rigan acht ros-marb uile. Is and asbert Cú Chulainn:

    1. Derbforgaill bruinne gel bán.
      domriacht dar srotha sáil:
      ba rath carat rodam-fír.
      ingen ríg a Lochlaind láin.
    2. O ro bói eter da fhert
      do-gní mert mo chride cnó:
      gnúis Derbfhorgaill fo licce leirg.
      Lugaid Riab n-Derg dirsan dó.
    3. [Ba h-allud mor do Lugaidh
      ba maith dorrumad orcainn:
      ised doroigai Lughaid
      fomrumaith oc Derbforcaill.]
    4. Ba h-allud mór do Lugaid
      boí fora chrannaib glee:
      coica cetguine cen dáil
      ba h-annud cacha ree.

      5. p.213

    5. Derbforgaill clú co n-áne
      co n-genus & fhéle:
      nocorala cor n-uabair
      gnúis dar gualaind a ceile.
    6. Trí coicait ban i n-Emain
      is me doruid a n-orgain:
      cia fogelmais ríg na túath
      ba luag dóib Derbforgaill.

D. .i. dér ingen Forgaill rig Lochlainde. Ro lad a fert & a l-lia la Coin Culainn.