Fecht nann do Ulltaib a n-Emain Macha iar scis aonaig & cluici, dolluid Concopar & Fercus mac Roich & maithi Ulad archena asan cluichimuigh a n-Emain, co ndesitar tall isan Craebruaid Concubair. Ni raibi Cuculaind ann na Conall Cernach na Loegairi Buadach an aduid sin. Batar immoro lath gaili fer n-Ulad ann olcena. Amul robatar and trath nona deog lai, co nacotar bachlach mor forgranna cuco isan tech; ar indar leo ni raibi di Ulltaib lath ngaili rosasad leth medi fair. Ba h-uathmor & pa granna a indus ind oclaig. Sencodhal fria cneass & brat dublactna imme & dos-bili mor fair, med gaimhlias hi tallad .xxx. ngamnoi. Suili ciochardha buide ina cinn, med coire rodaimh cechtar na da sula sin fria cinn anechtair. Remithir doid laimhe neich oili cech mer diau meruib. Cep ina laimh cli a raibi oiri .xx. & cuingi, biail ina laim deis a ndeocatar.uíí. bruthdamna, boi feidm cuingi sesrige ina samhtaig.