Corpus of Electronic Texts Edition
Fled Bricrend (Author: Unknown)

section 88

Immadraidiu ina menmain iersuidi a-lleim docotar a oes cumta tar an catraic, ar bad mor & pa h-ard & pa lethon a-lleim, & ba doich laiseom, ba do leim docotar an lath gaili tairsiu. Domidethor fo tri dia lemim & forrémtius. ‘Maircc domrommalt a nimned domromaltsai cus trasda immon curadmir’, ol Cuchulaind, ‘& a techd uaimb {folio 8b1} la fedmedh an leime docotar ind fir naill.’ Pa si tra boethar dogene Cuchulaind. Nocinged


p.174

for a cula etorbhuass fod norchora on catraig. Docinged dono etarbuas doridise asin mbaili hi tairised, co mbenadh a tuilcend risan catraic. Nolinged a n-airde fecht naill isan talom connici a glun ar truma a protha & a neirt. In fecht aili ni tisccid a druchd don feor ar denmne an aicnid & lútighi an lathoir & med na gaili. Lasan siabrad rosiabrad uime, fecht noen ann cingtisom tar in catraig amoig, co raibi tall a medon na catrach a ndorus an rigtigi. Ata inad a da traiged isan liic uil for lár na catrach, bhaili a raibi a ndorus an rigthigi. Teid isan tech lasodain & dolleic a osnaid ass.