Lasa-rrem & lasa mborrfad tra ronucsad laith ghaili fer n-Ulad imm Concopar & imon rigraid olcenae do Cruachnaib Aei, rolai airmgrit mor do Cruachnaib, co ntorcratar na h-airm asna fraichtib, co rabatar for talmain, & rusgeb cridh sluaga an dunaidh uili, conid samlaid rusboi sluag an duine uili amal curcuss fri sruth. Ismbert Medb lasodain: ‘Cusandiu dono’, or si, ‘o gabsusai Cruachnai, ni colusai in torainn cen na niula and cusanosai.’ Luid Findabair ingen Ailella & Medbha, co mbai isan grianan for fordorus an duine, co nderbert: ‘ A matharnaid’, ol si. ‘Cur i samlaid foair’, ol Medb, ‘a cruth a h-écuscc a congraimm, delbh an fir, dath a ech, tocim a carbait.’