Corpus of Electronic Texts Edition

Longes mac n-Uislenn (Author: [unknown])

section 18

265] In tan dano no-bíd Conchobor oca hálgenugud-si, is and at-bered-si in reicni sea sís:

Deirdriu

1. A Chonchobuir, cid no-taí?
   Do-rurmis dam brón fo chaí,
   Is ed ám [i] céin no-mmair,
   270] Do s(dot)erc lim ni-ba romair.
2. Ní rop áilliu lim fo nim,
   Ocus ní rop inmainib
   R[o]-ucais úaim—mór in bét—
   Connach-acciu-sa comm éc.
3. 275] A ingnáis is toirrse lem
   Tucht dom-adbat mac Uislenn.
   Caurnán cir-dub dar corp ngel.
   Ba súaichnid sech ilar fer.
4. Dá ngrúad corcra cáiniu srath,
   280] Béoil deirg, abrait fo dæl-dath;
   Déitgen némanda fo lí,
   Amal sóer-dath snechtaidi.
5. Ba súaichnid a eirred nglan
   Eter fíanaib fer n-Alban.
   285] Fúan cáin corcra—comul cóir—
   Cona imthacmung derg-óir.
6. Inar srólda—sét co mbríg—
   I-mbuí cét ngem—ilar mín.
   Fora imdénum is glé
   290] Coíca unga findruine.
7. Claideb ór-duirn ina láim,
   Dá gaí glasa co ngoth-gráin,

   ---

   p.51

   Finden co mbil óir buidi,
   Ocus taul argait fuirri.
8. 295] Fo-rruïch frinn Fergus find
   Ar tabairt darsa mór-lind.
   Ro-rir a einech ar chuirm.
   Do-rochratar a mór-gluinn.
9. Cía no-betis forsin muig
   300] Ulaid im gnúis Conchobuir,
   Dos-mbéruinn uili cen chlith
   Ar gnáis Noísi maic Uisnig.
10. Na briss in-diu mo chride;
    Mos-ricub mo moch-lige.
    305] Is tressiu cuma in-dá muir,
    Madda éola, a Chonchobuir.

    (A Chonchobuir)