110] A mboí-seom didiu a oínur int-í Noísi i-mmaig, mos-étlan-si cuci i-mmach amal bid do thecht secha ocus nis-n-athgéoin. ‘Is cáin,’ ol-se-sseom, ‘in t-samaisc téte sechunn!’ ‘Dlegtair,’ ol-si-si, ‘samaisci móra bale na-bít tairb.’ ‘Atá tarb in chóicid lat,’ or-se-sseom, ‘.i. rí Ulad.’ ‘No-togfainn-se etruib far ndís,’ or-si-si, ‘ocus no-gébainn
115]
tarbín óag amalt-so.’ ‘Ni-thó!’ ol-se-sseom. ‘Cid fo bíthin fáitsine Cathbad.’ ‘In dom fémed-sa adeiri sin?’ ‘Bid dó immurgu’ or-se-ssem. La sodain fo-ceird-si bedg cuci corro-gab a dá n-ó fora chinn.
120]
‘Dá n-ó méle ocus cuitbiuda in-so,’ ol-si, ‘manim-bera-su latt.’
‘Eirgg úaim, a ben!’ ol-se. ‘Rot-bia ón,’ ol-si-si. At-racht la sodain a andord n-ass. Amail ro-chúalatar Ulaid in-nunn in n-andord, at-raig cech fer díb di alailiu.