Corpus of Electronic Texts Edition
Togail Bruidne Da Derga (Author: Unknown)

section 3


45] Gabais saint in rí n-impe fo cétóir & da-raíde
46] fer dia muindtir ríam di astud fora cind. Im-chomarcair
47] in rí scéla dí & as-bert fria ina sloindiud :
48] ‘Inum-biasa úair coibligi lat?’ ol Eochaid. ‘Is ed
49] do-roachtmar fort foesam sunn ’, orsí.
50] ‘Cest: can deit & can do-luid?’ ol Eochaid. ‘Ní
51] anse’, olsi. ‘Étaín missi, ingen Étair Eochraidi a
52] sídaib. Atúsa sund fichit m-blíadna ó ro génair i síd .
53] Fir in t-síde eter rígu & chaemu ocum chuindchid &
54] ní étas form fo bithin rot-carusa seirc lelbhán óba
55] túalaing labartha, ar th'airscélaib & t'ánius, & nít-acca
56] riam & atot-gén fo chétóir ar do thúarascbáil. Is tú
57] doroacht íarum’.
58] ‘Ní ba taig drochcarad h-i céin dait ém’, ol Eochaid.
59] ‘Rot-bia fáilte & léicfider cach bean do mnáib airiut
60] & is acut t'aenur bíasa céin bas míad lat’.
61] ‘Mo thinnscra choir dam’, orsí, ‘& mo ríar íar suidhiu’.
62] ‘Rot-bía’, ol Eochaid. Do-berthar .uii. cumala dí.