Corpus of Electronic Texts Edition

Serglige Con Culainn (Author: Unknown)

section 29

332] Téit in gilla iar sin co airm i m-boí Emer, & adfét amal
333] boí Cú Chulaind. ‘Olc duitsiu, a gilli,’ for sí, ‘ar is tú taithiges
334] in síd cen fheib íca do thigerna d' agbáil lat. Trúag d' Ultaib,’
335] for sí, ‘cen shirthin a máríca. Diambad Conchobur credbaigthe,
336] nó Fergus níthastar súan, nó Conall Cernach tabsath créchta,
337] is Cú Chulaind cobarthe.’ Cachainsi íarom laíd la sodain fon
338] chruth sa:[LU2]

1. 339] ‘A meic Ríangabra fó rír,’
   340] ‘cid menic imthigi in síd,’
   341] ‘ní moch doroich let i l-le’
   342] ‘ícc meic delba Dechtere .///’
2. 343] ‘Trúag d' Ultaib co lín garta,’
   344] ‘eter aite is chomalta,’
   345] ‘cen shiriud in domain duind’
   346] ‘d' ícc a carat Con Culaind.’
3. 347] ‘Mád Fergus no beth i s-súan,’
   348] ‘dá n-íccad aicned óendrúad,’
   349] ‘ní bíad mac Dechtere . i fos’
   350] ‘co fagbad druíd dia thomos.’
4. 351] ‘Diambad h-é Conall chena’
   352] ‘fris m-betís créchta is chneda,’
   353] ‘no sirfed in Cú in m-bith m-bras’
   354] ‘co fagbad líaig dá leges.’
5. 355] ‘Mád do Láegaire Búadach’
   356] ‘tísad ág bád imúallach,’
   357] ‘no sirfed h-Érind na n-íath’
   358] ‘d' íc meic Connaid meic Ilíach.’

---

p.13

6. 359] ‘Dámbad do Cheltchar na celg’
   360] ‘tísad súan & sírsherg,’
   361] ‘robad astrach aidchi is lá’
   362] ‘eter sídaib Sétantá.’
7. 363] ‘Dámbad Furbaidi na fían’
   364] ‘no beth i l-lige lánchían,’
   365] ‘no sirfed in domon n-dron’
   366] ‘co fagbad a thesarcon.’
8. 367] ‘Atbathsat slúaig Shíde Truim,’
   368] ‘ro scarsatar a mórgluind:’
   369] ‘ní thét a c-Cú dar cona’
   370] ‘ó ro gab súan síthbroga.’
9. 371] ‘Uchán do galur nom geib’
   372] ‘ó Choin cherda Conchobair:’
   373] ‘is sáeth rem chridi is rem chnes,’
   374] ‘día tísad dím a leges.’
10. 375] ‘Uchán is crú mo chraide’
    376] ‘serg for marcuch in maige,’
    377] ‘conná toraig sund i l-le’
    378] ‘d' óenuch Muge Murthemne.’
11. 379] ‘Is de ná tic a h-Emain’
    380] ‘dáig na delba ro n-dedail:’
    381] ‘is merb is is marb mo guth,’
    382] ‘dáig atásom fó drochcruth.’
12. 383] ‘Mí & ráthe & blíadain’
    384] ‘cen chotlud fó chomríagail’
    385] ‘cen duini bad bind labra —’
    386] ‘ni chúala, a meic Ríangabra.’

    a meic R.

p.14