Loutar andiaid na Fomore dno Lug & an Daghdou & Ogma, ar cruitire an Dagda ron-ucsad leo, Uáitniu a ainm {MS folio 70b}. Rosaghad ierum a flettech a mboi Bres mac Elathan & Elathan mac Delbaith. Is ann boi in crot for in fraighid. Is si in cruit sin ara nenaisc in Dagdae na ceola conna rofograighsetor tria gairm co ndegart in Dagda intan atbert annso sis:
Dá n-ainm dno batar foran cruit-sin .i. Dur-dabla & Coircethairchuir.
- Tair Daur-dablao.
Tair Coir cetharchuir,
Tair sam, tair gam,
beola crot & bolg & buinne.