Corpus of Electronic Texts Edition
The Second Battle of Moytura (Author: Unknown)

section 127

O tanaic, tra, airis an cathai moir atrarochtor na Fomoire asa scoraibh sechtair, & deronsud catha daiggne ditogladai dib. Ni rabhu tra airich no fer engnamae diob cen luirig friae chnes, cen catbarr for a cend, cin manais muirnig 'na deis, gen cloidim tromger for a cris, gen scieth daiggen for a formnai. Ba bein cinn fri hald, ba laum a net natrach, ba haigedh go tenid cor fri sluag na Fomoire isin lo sin.