Corpus of Electronic Texts Edition
The four jewels of the Tuatha Dé Danann (Author: Unknown)

p.83

Ceithri cathracha i r-robadar Tuatha De Danand ic foglaim fheasa ocus druidechta, uair is fis ocus druidecht ocus diabaldanacht ro fhogain doib. it e-seo anmanna na cathrach .i. Failias, ocus Findias, ocus Goirias, ocus Murias. Ocus is a Failias tucad in Lia Fail, fil i Temraig, no gesed fo cech rig no gebead h-Erind . A Gorias tucad in claidheb bai ic Nuadaid. A Findias tucad sleg Loga. A Murias tucadcoire in Dagda.

Ceithri fiseda badar isna cathrachaib sin .i. Fessus bai h-i Failias, Esrus bai ic Gorias, Uscias bai a Findias, Semias bai a Murias. Is aco sin rofoglaimsed Tuatha De Danand fis ocus eolus. Sleg Loga, ni gebthea cath fria na fris inti a m-bid laim. Claidheb Nuadad, ni thernad neach ara n-dergad
[gap: extent: 2 characters]
. O da berthea asa thindtig bodba, ni gebti fris inti a m-bid laim. Coiri in Dagda, ni teigead dam dimdach uad . An Lia Fail, fil i Temraig, ni labrad acht fa rig Erenn.


p.84

Ad-beraid, imorro, aroile do seanchaidib conid a n-dluim ciach tistais Tuatha De Danann i n-Erind. Ocus ni h-ead on, acht a longaib na morloinges tangadar, ocus ro loiscsed a longa uili iar tuidecht i n-Erind. Ocus is don dluim ciach bai dib side, at-dubradar aroile conid a n-dluim chiach tangadar. Ocus ni h-ead iar fir . Ar is iad so da fhochaind ara r' loiscsead a longa na r' fhagbaidis fine Fomra iad do fodail forro, ocus na ro thisad Lug do cosnum rigi fri Nuagaid. Conid doib do chan in seanchaid:

    1. Tuath De Danand na set soim.
      Cait a fuaradar fogloim?
      Do rangadar suigecht slan
      A n-druigecht , a n-diabaldan.
    2. Iardanel find, faith co feib,
      Mac Nemid, mac Agnomain ,
      D'ar mac baeth Beothach bertach,
      Ba loech leothach, lanfhertach.
    3. Clanna Beothaich, — beoda a m-blad —
      Rangadar sluag niath nertmar,
      Iar snim is iar toirrsi truim,
      Lin a loingsi co Lochluinn.
    4. Ceithri cathracha,— clu cert —
      Gabsad a rem co ronert.
      Do curdis comlann co cas
      Is d'foglaim a fireolas.
    5. Failias ocus Goiriasglan,
      Findias, Murias na morgal,
      O maitea madmann amach,
      Anmanna na n-ardchathrach.

    6. p.85

    7. Morfis ocus Erus ard,
      Uscias is Semiath sirgarg,
      Re n-garmand, — luag a leasa —
      Anmann suad a s-sarfeasa .
    8. Morfis fili a Failias fen,
      Esrus a Gorias, germen,
      Semiath a Murias, dind dias,
      Uscias fili find Findias.
    9. Ceithri h-aisceda leo anall,
      D'uaislib Tuaithi De Danand:
      Claideb, cloch, coiri cumal,
      Sleag ri h-aidid ardcurad.
    10. Lia Fail a Failias anall,
      Gesed fo rigaib Erend.
      Claideb lama Loga luidh
      A Goirias, — roga rocruid.
    11. A Findias tar fairrgi i fad
      Tucad sleg nemneach Nuadat.
      A Murias, main adbol oll,
      Coiri in Dagda na n-ardglond.
    12. Ri Nime, Ri na fer fand,
      Ro-m-aince, Rig na rigrand,
      Fear ca fuil fulang na fuath,
      Ocus cumang na caemtuath.

      Tuata.

Finit.