- Cumma lem etir
cen co tías ilLaighnib,
bat imda a n-airlig,
is léir for a n-airdhibh.- Cindus beiti cena
bat fássa a rátha,
bidh fann a cumang
tall a laithi brátha.- Mór let a manach
la Caemgen féne,
is dá trían la hAbán
is la Moling in tslébi.- In trían ná bérat-somh
for nem dia laechraidh,
is íat-side bérat-sa
a lógh mo shaothair.- Is íatt-so na lochranna
da lasfatt Laighin,
dobér-sa anosa
a crosa darm'aigidh.- Ní loiscfe an tene
lam treasa talchair,
nem ocus talamh
raghaidh dia manchaib.- Gidhedh nogabdais
ó Bhir co Berba,
cech leth naragdais
ní tairgtais demna.- Bid fír an dordán-sa
dordaid dam aingil,
crícha in chorpáin-so
bid íad-so am anmain.- Togaide an tríar-so
tairngires sinne,
in mac raith Eibbán
ataldar linne,
Moling na Taeidhen
is Caemgin Glinne.- Bad sgríbtha a sgéla,
bad fleda a fadla,
níscoirset cesa
cen lessa a n-anma.- Cech saer nosléma
ar lár a thíre,
acht aen díb ní gébha
rath, recht ná ríghe.- Cech aen ba nesa
da cathraib calma,
bid íatt bus mesa
dúibh for bith Banba.- Acht co tí an lá-so
bat fása falma,
íar foillge flatha
cen catha calma- Dáilfadh an Dúilem
dóib co lár a tempail.
flaithius ind alltair,
maithius in chenntair.
- Is na cléirigh aile
ticfat díb sunna,
bat crín is bat croma,
a bein, is cumma.Cumma.