Corpus of Electronic Texts Edition
Aisling Tundail (Author: [unknown])

section 27

¶1] {MS page 809}‘Is mor do maith atchi-si, a Thundail.’ ‘Is mór, a tigerno’, ar sé, ‘et guidhim tusa, masa tol let, leg damh comhnaidhe sunn.’ ‘Is egen det sódh i curp, a Thundail’, ar sé ‘Et cuimnigh co maith a facuis ardaigh tarba do lucht in cenntuir.’

¶2] Rocáoi in t-anam co trúag aga cloisdecht sin et atbert: ‘Ga holc dorighnes, a tigerno, intan is egen dam dol a curp


p.119

aris?’ Frisgart an t-aingel: ‘Ní dingmala duine don gloir si acht ogha namá, neoch coimetuid a cuirp ó gach uile peacadh et rodemad a losgad siú rotruaillfitis a cuirp ar gradh De. O nar' creidis-si damh-sa itt churp, ní cuimge anadh sunn. Acht chena impo it churp & sechain na huile holc festa. Bet-sa fein 'gut furtacht et 'gut comairlechad go daingen.’

¶3] Nír coimlinadh moment on imaccallaim sin an aingil, intan romothaig Tundal beth ina curp fein. Ro oslaic a súile co hanbann annsin, ro-iacht go hadbul et nir' labair. Atconnairc na cleirigh ina timchell. Rocaith corp Crist iaram co ngairdechus mor. Rofodail a maithes ar bochtaibh De. Rofulaing airdea na crochi do chur ina etan lasodain. Rotriall aithris gach neth adconnairc et rotegusc duine betha maith do beth againn. Rogab ag senmoir bréithre Dé co duthrachtach ecnaid, ger 'bo hainfesach riamh. Sinne immorro ní fetmaid intsamlugud a bethaid, gidhet roerbamar a sgribad ar tarbai do lucht a legtha et a héstecht ardaigh co mbethis bennaigthi tall et abhus.FINIS

39