¶1] Lasodain atchi Tundal caistéoil & pailliuin imda do purpuir et bis, d' or et d' airget & sida et araile cumdaighe examla. Badar dibh orgána et timpana et clairsiocha & gach adbh ceóil ar cena ag a seinm inntib-sidhe.
¶2] ‘Cred é sud?’ ar Tundal. ‘Ag so ciunus na ndaoine crabaid’, ar in t-aiggel, ‘neoch rothreigset a tola fein ar Día & rotog umla & {MS page 805} inisle sech úaill & dimus & rob umal dá n-uachtaran & fuair blas ar a spirtaltacht & rocuimrighid a tengtha & ní o ulc amain, air nirb ail léo labairt o maith, fobith comad tochtach.’
¶3] ‘Dobad mian leam’, ar Tundal, ‘dul ina fochair súd astech, acht comad toil let-sa, a tigerno.’ ‘Cedighim-si duit a n-éstecht & a faircsi,’ ar an t-aingel, ‘acht chena ní raga ina tercumusc. Dethbir son, ar ní tét ina cenn acht ogha accus cech aon tet cucu ní sgar friu dogrés ar belaibh na Trinoide samhaigitt tre bhithu.’
¶4] Is iarsin atconncutar anmanda ban & fer co ndeallradh aingel, go mboltanugudh logmar, co bfogur mbinn os gach uile gloir da faca roimhe & gach uile adba ciuil.