Corpus of Electronic Texts Edition
Eine Variante der Brendan-Legende (Author: Unknown)

section 5

Iar faicsin na pian sin do Bhrenainn co-cualaidh in nuallgubha ndermair ndofhulachta n-etualaing & in chúi chiamair attruagh et in golgaire ndichumhaing i fudomain iochtair ifirn. Is annsin roghabh imeccla in clerech fri adhuath na troighi sin. Conidh annsin at-connairc Brenainn in carraic ndermair, is fuirre sidhe ro-búi a n-at-cualaidh. & ticedh in muir ifernaidhe da cech aird darsin carraicc .i. tonn teinedh dubhruaidhe anair thairsi & tonn uar eighreta aniar cech re fecht. Is annsin bui oénduine truagh ina shesamh forsin carraic. Iarfaighis Brenaind de, cuich é. ‘Hiúdas Scarioth meisi’ olse. ‘Et is me do-rec mo thigerna do


p.415

chinn airccit & innmais dhímiccnigh dimaoin in tsaogail .i. Isu Crist mac de bí. Et as dermair’ olsé ‘mét mo phian n-examhail. & biat amal at-cí-siu o'níu cotí in brath.’ Is annsin ro-chúi Brenainn fri mét na troighi, i-facaidh Iúdas do beith. Conidh ann do-righne na runna becca sa oc taithmet a peini do Brenoind:
    1. Iudas Scarioth me indiu.
      for tonnaib na trenfhairrgiu
      truagh mo betha gaibthech gorm.
      icom pianadh i n-ifornd.
    2. O thuind teinedh for tuind uair.
      o thuind uair for cech tuinn trein
      mé 'com pianadh as cech aird.
      truagh in gairm mo beth i pein.
    3. Maircc damh sa treccadh mo righ.
      olc in gnímh fa-tucus laimh
      beithir de tria bithu sír.
      cen sídh is cen ceannsa saimh.
    4. Hichtar ifirn cech re n-uair.
      truagh in grifing bís fóm thaebh
      demhnu dubha bít im dháil.
      uch a lágh ní cuma caemh.
    5. Maircc do-righne maircc do-gni.
      maircc a thurus for bith cé
      intí do-ní saint tar ró.
      maircc fa dó & maircc a dhé.
    6. Maircc damh-sa mo saint rom-baidh.
      demhnu gaircc at-cim arnuair
      maircc mo turus a dé dáibh.
      maircc do-raidh mo cubhus crúaidh.
    7. Uch a Brenainn fégaidh me.
      cech a n-dénaim damh is mo
      ifern dona daér dubh dall.
      uch as ann atú-sa béo.
    8. Uchán uch luach braith mo righ.
      co sírsir do-ghebh a olc
      tricha circull airccit báin.
      is e sin do-craidh mo chorp.
    9. 9Ar innmhus tucus mo righ.
      uch is tríd as olc mo díl
      ní-mair in t-ionnmus dom réir.
      mairim si i péin tria bith sír.
    10. Uch nach marbh me a meic mo de.
      uch as garb do-geibhim gleo
      uch me ar lasadh cuma cet.
      ni-fhaghaim éc acht mé béo.
    11. Crumha croma bit fom thaebh.
      dubha donna truagh in baigh
      gair tafaind ann cech re n-uair.
      truaigh in grafaing bít im dhail.

    12. p.416

    13. Uch a aircit maircc do-gni.
      uch do-airccis mé fam dé
      uch a ionnmais bhréccaigh baín.
      uch is plaígh ro-imres féin.
    14. Maille re demhnaibh atu.
      uch rom-medhradh olc mo gné
      do-clos tre diumus mo gnaoi.
      is Iudas Scarioth me.
    15. Iudas Scarioth.