Co n-aca iarum arbar de ainglib ara chiunn. Acus co n-accatar arbar aile do demnaib acus finna (?) tenntide impueib, acus tene as gech ball ro bui inntibh. Teora dealba do-arfás do forsna h-ib demnaib. Dealb rodub for alaile dib, acus gai boilggi tentidi ina lámaib, acus dealb ciardub for alaile, acus saigde tentide ina lamaib. Dealb mothluch forsin tres lucht, acus find tentidi trethu amail finn n-omthainn, acus goith tentide ina l-lamaib.