{folio 44ra}Feachtas luid Laisren for slatrad o muintir Cluana do glanad Chluana Cain, cell file a crich Connacht. Ro áin tri tredna la glanad na cille. I forciunn an tres tredain doforthrom cotlud fair isin derrthach, cu cuala trena cotlud in guth fris: ‘At-rai-su as!’. Nin gluais an cetna fecht. Co cuala aitherrach in guth. To-ocaib a cenn la sodain acus do-beir airde na croichi dara gnuis. Co n-aca ba solas ind eclais i m-bai, acus bai drechd din aidchi beos. Acus co n-aca in deilb n-etroicht etir an crocaingel acus an altoir.