Is e airrdi an t-sesed lá ria{column fo 95b2} m-bráth .i. na h-uili crann & cloch do beith ac snighi fola ann, & trigi gaoithi gairbhi gére do eirgi ann nech le croiter an bith uili a n-aoinfhecht. Gul & scrécach & éimhe & osnumach truagh thoirrsech ac síl Adhaim ag athcuingi an talman d'oslugud reompu, conach betais ag feghain na n-olc n-dermair-sin, uair do bo fherr fo shecht leo bás d'fagbáil iná beith béo an uair-sin.