Ind fairend immorro atragat innosa tria Críst isin chetna esergi .i. ind esergi bis tria aithrigi, atreset dano thall tria Chríst i n-esergi in bethad suthain, & nos-bera leis isin flaith suthain i frecnarcus ind Athar nemda tria bithu na m-betha. Is and-sin fo-gébat na fíreóin fochraic n-dermáir ara sualchib & ara n-deggnímaib .i. in Comdiu feín o fúaratár na súalchi-sin & na deggníma. Ar is é in Comdiu bas chomlantius cecha airir & cecha h-airfite thall dond eclais. Is e dano at-chichestár tria bithu ond eclais cen crích, cen forcend, carfaider cen emiltius, molfaider cen scís. Ar is e-seo iar fír in bethu suthain tarngirther dona náemaib & dona firénaib iar n-esergi, frecnarcus na nóem-Thrinoti úasli, Athar & Maic & Spirta Náim.