Doraga tra ind úair i m-bia esergi dona h-ulib marbaib tria erfuacra Maic Dé, & atreset and-sin ind fairend dorónsat na mathi i n-eserge m-bethad. Ind fairend immorro dorónsat na h-ulcu i n-eserge n-digla & fugill. Is and-sin arthraigfes in brethem díada isin delb-sin in ro mided fó brithemain dóennai. Is and-sin midfed-som co firen forsna dóenib isin deilb in ro mided co h-anfirén óna dóenib. Is and-sin dano arthraigfes brithem fíren in ciniuda dóennai .i. in Comdiu Isu Críst, isin deilb inad sochma do chách a fegad, eter firenu & pectachu .i. i n-deilb a dóennachta.