Corpus of Electronic Texts Edition
The Tidings of the Resurrection (Author: Unknown)

section 12

Cestnaigther dano do forcraid na foltni & na n-ingen, cía ord bias forru isind esérgi. Érnid Augustin in fer naem in cesta-sin, & is i a thomtiu, forcraid na foltni & na n-ingen con-nách intib féin nammá comthóither tháll isind esergi, acht i n-aicned in chuirp hi coitchiunn. Úair ni de fat na foltni .i. dia forcraid, acht día n-árim nammá cumniges Ísu isin t-shoscelu, in tan aithnes aní-seo día apstalaib, co n-abbair: Foltni for cind-si, ar Isu fria apstalu, atát i n-árim chinti2 & i n-aichnius demin icon Chomdid, & mértait ule duib-se aci thall isind esergi3.