Corpus of Electronic Texts Edition
The Tidings of the Resurrection (Author: Unknown)

section 11

IS tomtiu immorro icond eclais co techtfat cuirp na martíri nóem intib iár n-esergi fulliuchta na crécht forodmotár ar Críst cen esbaid cen dígbáil déilbe no sochraidechta forthu do falsigud a m-buada & a coscair & dano do falsigud na fochraici móri dlegait ón Chomdid ara m-martra, iar n-desmirecht sin chuirp in Chomded techtas and iar n-esergi fulliuchta na crécht forodaim ó Iudaidíb do folsigud a umalloti forbthi dond Athair nemda, & dano do thuilliud phene & todernama dona h-Iúdaidib o ro forodaim-sium na crechta-sin.