Cestnaigther didu uair atresat na h-uli dáini a bás, cía h-áes nó cia delb i m-bia esérgi dóib. Ocus tráchtaid in t-apstal in cesta-sin, co n-abair: Atresat na h-uli daini a bás, ar in t-apstal, iar cosmailius aesi & delbi Críst. Tri bliadna trichat immorro ropsat slána do Críst, & is i cosmailius na h-aisi-sin atracht-som a bás. I n-áis dano Crist, at-beir in t-apstal, inna h-uli daine do eserge, & ni inna méit .i. ni i commétius a chuirp, ar ni h-airchend co m-bat comméti ule cuirp na esergi. Fedligfid immorro Críst do grés cen tulled, cen dígbáil, isin delb & isin méit in ro arthraig dia apstalaib iar n-esergi, & is airi-sin cid i n-óen-áis atresat inna h-uli dóini .i. i n-áis trichtaigi. Araidi techtfait méit n-écsamail & méit n-ecutrumma ina corpaib iar cosmailius & iar n-aicniud na n-amser & na ferand i r-rogenatár.