Is demin dana co n-dingniter cethri budni don chiniud dóenda i l-ló bratha. Buden ém dib do-gentar do mes & ragait aithle a m-messa dochom péné & tódernama. Is friu-side at-béra in Comdiu in n-aithesc n-aduathmar-so oca n-innarba uad: ‘Scuchaid dím, a mallachtnachu, isin tenid suthain rofaired do díabul & dia drochmuintir.’ Is iat-sede na comallat o gním in maith gellait o bélaib. Is e ainm na fairni-sin isin scriptúir: mali non ualde .i. uilc nach adbulolc.