Corpus of Electronic Texts Edition

Irish Litanies (Author: Unknown)

Litany 10

Litany of St Michael

³

Maelisu hua Brolchain cecinit
1. A aingil,
   Beir, a Michil mór-fhertaig,
   Gusin Coimdid mo chaingin.
2. In cluine?
   Cuinnig co Dia ndilgudach
   Dilgud m' uilc adbail uile.
3. Na furig!
   Beir mo dúthracht ndiuburtach
   Gusin Rig, gusin Ruirig.
4. Dom anmain
   Tuc cobair, tuc comdidnad
   In uair techta don talmain.
4. Co daingen
   Ar cend m'anma ernaides
   Tair co nilmilib aingel.
   A aingil.
5. A mílid,
   For bith cham clain cosnumach
   Tair dom cobair darírib.
6. Ni tarda
   Dínsium fora nabraim si,
   I céin mairer, nim fargba.
7. Not togaim,
   Gu ra saera m'anmain si,
   Mo c[h]onn mo c[h]eill mo cholaind.
8. A chaingnig,
   A choscuraig, cath-buadaig,
   A marbad Anchrist ainglig,
   A aingil.

p.92