Corpus of Electronic Texts Edition
Instructio Pie Vivendi et Superna Meditandi (Author: [unknown])

section 21

DE AVARITIA .i. DON T- SAINT.


Agus da mothuighthear dochum in chroidhi hi, diult co dichra
25] uait hi, oir atá sí dochrach agus ní h-eigin duit hí. Agus is
on conach agus o neithibh dhamanta thic si, agus is cóir
cathughadh re o mhodhaibh iomdha. An chead mhodh dibh:
cuirit siat friochnumh agus ceandsil mor ar in croidhi aga
faghbhail, ac denumh saethair agus fuireachrais agus mara
30] agus tiri agus ac fulang guasachta iomdha ele, agus ní
mhothuighinn an bocht firi gradh na neithe so arna cur a
tarcuisne ar son Dia. An dara h-adhbhar: na daine da ndailtir
in conach bith ecla gach aein duine orra, oir sailit gurab gadaighe
in duine bocht, agus corab sladaidhi in duine saidhbhir, agus

p.147


ni mar sin bhis in duine bocht, acht bí se indill do ghnath,
ar son nach fuil aigi raed mhillis he. An treas adhbhar: in
tan theid a ni on t-santach toirrsighthir e chum bais, agus
bid suaimmis spioradalta ag an bocht ar son espadha an t-saeghail.
5] An ceathramhadh ni: an duine ghradhuigheas an saeghal bid
se ac seirbhis do mar mhodh ndochraidh agus mar
sherbhfhoghantaidhi shalach acca umhlughadh fein ann. Gurab
aire sin adeirmait nach fuil an conach ac neach da ngradhuigh
co mór he, ar son gurab modh do e agus nach tighearna, agus
10] co ndeachaidh Dia uadha ar a shon leis, agus ata an duine
bocht ar son Dia ro-chonaich. An cuigeadh adhbhar: in
ti thinolas in conách, ni bhia sasta choidhchi, oir ni lór lais
aen ni: ata an bocht contrardha do sin, oir ni thaiscind se aen
raed do fein, agus do-bheir amach an ni fheadas. An seiseadh
15] adhbhar: ata an conach ina ghaisti agus ina lin ac an Diabhal
a timchill luchta in chonaich fein, iondas nach leicind indtogh
doibh dochum Dia, amhail adeir an t-apstol, qui volunt divites
fieri, incidunt in temptationem et in laqueum Dyaboli .i. na
daine lenab ail beith conaich, tuitid a lin agus a ngaisti in
20] Diabhail sin. An bocht fhacbhas gach aen raed inndsamhluighi
se Dia, oir tuicidh se nach eidir leis a leanmhain agus eiri mór
air. An seachtmhadh adhbhar: is toirrseach {MS folio 47b2} searbh
leis in duine conaich in bas, agus is forbhfailteach aibhind leis
in mbocht hé. An t-ochtmhadh adhbhar: an tan théid fear
25] conaich dlighi co ntéid a mbí aigi uadha da aindeoin, agus in
tan théid in bocht gabhaidh sé in conách naemhdha chuigi
maille re gairdeachais mhór. Tabhair dot úigh so co
h-indtinneach agus ní ghraidheochair na neithe talmhaidhe.
Bith a fhis agad fos co fuilid ceithre gneithe dona dainibh .i.
30] duine sanntach agus duine fial, duine silteach agus duine borb.
An duine do-bheir an raed is intuctha agus chonnmhas an raed
nach indtuctha, is e sin an duine fial. An duine nach tabhair
an raed is intabhartha agus chonnmhas in raed is inchonnmhala,
duine sanntach sin. An duine do-bheir an raed as intuctha
35] agus nach connmhann an raed as inchonmhala, duine silteach
sin. An duine nach connmhann in raed is inchonnmhala agus
nach tabhair an raed is intuctha, duine borb an-ecnaidhe sin.

p.148